O upu a le atunuu o se faiva e tapua’ia e a’e ma le manuia, e faapena lagona o le malo i le tapuaiga a tinā ma tamā matutua, o faafeagaia taulagi a o alo faiva le atunuu i ana taligamalo i le fonotaga a ta’ita’i o malo o le Taupulega i le vaiaso na se’i mavae atu nei.
Na faatumulia le fale taalo i Tuanaimato i tagata faigaluega a le malo, o malo faaaloalogia, o le Kapeneta aemaise o le Ao Mamalu o le Malo ma le Sui o le Fono o le Sui Tofia i le sauniga.
I le saunoaga autu a le ta’ita’i o le malo, le tamaitai palemia o Fiame Naomi Mataafa, “E ao ona tatou momoli le faafetai ma le viiga i le Atua, ma tatou faapea ane, ‘le Alii e, ua fai lava Oe ma mea matou te nonofo ai i augā tupulaga’. ‘Matou te ta’u atu lou alofa i le taeao, ma lou faamaoni auā ua na o Oe o lo matou ‘olo maualuga, o lo matou malosi, o le talita, ma lo matou faamoemoe’. ‘Faafetai, faafetai, i lou faapalepale mai, ma lou alofa tunoa sa malu tapuaaoina ai si o matou atunuu i lenei faalagamaea tele.’
“Ua malie mata i vaai, ua malie pule, malie mālō, malie ma le lautua o le loto, i lou lelei ma lou faamaoni.”
Na ave foi le faafetai a le malo i le atunuu i le fai o le faiva o le taputapua’i aemaise o tapenaga i le faamatagofieina o aai ma le talimalo i sui o atunuu ta’itasi sa asia afio’aga o loo latou faalauiloaina, o le saofa’iga a alii ma faipule, faletua ma tausi ae faapea foi i faafeagaiga, i le nofo tatalo.
Faaalia e le tamaitai Palemia e lē mafai foi ona galo le agaga o le faafetai i Kamupani ma le Vaega Tuma’oti uma sa fesoasoani malosi i lenei fonotaga, aemaise i fonotaga mo vaega tau pisinisi, fonotaga a tamaitai, o tupulaga talavou, faapea tagata o Malo o le Taupulega.
Saunoa le tamaitai Palemia e tulagaese foi le fono lea a Ta’ita’i o Malo o le Taupulega, ona o le ulua’i taimi lea ua talimalo ai se atumotu laitiiti i le Pasefika, aemaise o le Malaga mai o le Tupu o Peretania ma lana Masiofo.
