Ua ave le faafetai a le afioga Patele Mosese Vitolio Tui i le Tamā Paia ma le pulega o le Ekalesia Katoliko i lona laumua i Roma, i le faatuatuaina o lona tagata e avea ma Aki Epikopō fou e faauluulu iai le Puleaga a Samoa Apia, ma sui tulaga i le afioga Patele Alapati Lui Mata’eliga ua tuumalo.

I se talanoaga ma le Aki Epikopō filifilia i auala o fesootaiga faaonaponei, na faasoa mai ai i sona lagona e tusa o lona valaauina.

O le afioga Patele Mosese Vitolio Tui, o lona tuaa tina e mai le afioaga o Safotu i Savaii ae o lona tuaa tamā e mai le afioaga o Falefa.

I le talanoaga ma le Aki Epikopō filifilia na fesiligia ai i sona finagalo e tusa o lona tofiga ma le malosi o le tulafono a le Ekalesia Katoliko le Cannon law e faasino i le pulea o meatotino e pei o tupe ma fanua. 

Le afioga Patele Mosese Vitolio Tui o le Aki Epikopō filifilia o le a faauluulu iai le Puleaga a Samoa Apia.

O le aso 22 o le masina o Aokuso ua faatulaga e faia ai le sauniga e faauu ai le tofiga Aki Epikopō fou.

O le a muamua faamavae i Palisi poo parish o loo galue ai nei i Niu Sila ma le ituaiga Salesio o le Don Bosco o loo galue ai o se faifeau ositaulaga.