O le soifua tuputupu a’e o le afioga Folasaitu Julia Ioane i totonu o lona aiga, sa lē mafai e lona loto ona faagaloina le apoapoai ma le tuualalo a nai ona tuaa e faapea, ‘o le ala i le pule o le tautua’.
Ia tautua i le aiga, ia tautua le lotu ma le atunuu.
Ae o le mau mai le afioga Paia a le Atua sa pipii lava i totonu o le latou fale sa fai lea ma faamalosiau mo i latou uma, Filipi e 4:6 ‘Aua ne’i popole outou i se mea e tasi, a ia faailoa atu o outou manao i mea uma lava i le Atua i le tatalo ma le faatoga atoa ma le faafetai.’
O mau nei sa nofo lava ma mafaufau iai i taimi a o soifua mai nai ona tuaa, ma o lea sa taumafai ai loa ia faataunuu upu sa talanoa atu ai ona mātua ia te ia.
O Folasaitu Julia Ioane e mai afioaga o Leauvaa ma Puapua i le aiga o lona tina ae o lona tamā e mai afioaga o Fasitoo uta ma Lotofaga.
O loo galue nei o ia i le ofisa o faamasinoga i le vaega o le Clinical Psychology i le faiga o lipoti i ni faalavelave o loo tutupu i tagata faatasi ai ma le galue i tagata ia ua solitulafono ina ia taumafai lea ia aua ne’i
toe oo le olaga i le solitulafono.
O loo galue foi o le faiaoga i le iunivesite i Aukilani i le vaega lava lenei o le Clinical Psychology.
O le soifua tautua o le afioga ia Folasaitu Julia Ioane i le ofisa o faamasinoga ma le iunivesite i Aukilani ua faaee ai e le iunivesite le faailoga taualoa o le Polofesa i lea tamalii ona o lana sailiga malo i le atunuu e ala i lana tautua.
O le amataga o le tausaga lenei o Ianuari na tauaaoina atu ai lea faailoga faapitoa ma le aloaia i le afioga ia Folasaitu Julia Ioane, ma sa leai sona lagona e faalautele lea faaeaea ua ia maua, pau le agaga ia te ia o le loto faafetai i le Atua ona o lea ua taunuu le upu a nai ona mātua, ‘o le ala i le pule o le tautua’.
Aemaise ai o le faamausalīina o le mau o le afioga a le Atua i lona aiga, ia aua ne’i popole i se mea e tasi ae tuuina atu mea uma i le Atua.
O le faaeaea a aiga o Folasaitu ia te ia na lē tuua ai le naunau o nai ona aiga ma uo e fai se aso faapitoa mo ia e patipatia ai lona faailoga taualoa ua siitia ma maualuga ai aiga.
Ma o le aoauli o le Aso Faraile na tumutumu ai le hall a le Otara Music and Art Centre i Otara i uo ma ē masani aemaise o aiga na lolofi atu e fiafia faatasi ma faafetaia le alofa o le Atua ona o lea ua tau lau o le faamoemoe na saili malo iai se tasi o lupe faalele a le aiga i totonu o Aotearoa.
