Sa faapea e amata le tausaga fou i se siitaga i le tau o oloa tau suauu ma penisinisi i Samoa peitai ua faailoa e le Minisita o Tupe le afioga Lautimuia Uelese Vaai o loo faaauau le pa’ū o le tau o le suauu i atunuu o loo gaosia lea oloa ma o atunuu ia o loo i le faalapotopotoga ua ta’ua o le OPEC, poo atunuu o loo gaosia ma tufatufaina lea oloa i le lalolagi, o le mafuaaga lea ua faaauau ai pea ona palasi maualalo le tau o lea oloa i lo tatou atunuu.
Ua faaopoopo atili le pa’ū o le tau o suauu ma penisinisi ona o le maualuga o le aogā o le Tālā Samoa, ma le pa’ū o le tau o lea oloa i le atunuu o Sigapoa lea o loo aumai ai a tatou suauu ma penisini.
O tau fou mo Ianuari o lenei tausaga fou 2024, o le penisinisi ua 3 tala 15 sene i le lita faatusa i le tau ia Tesema sa 3 tala 23 sene i le lita.
O le suauu kiso ua pa’ū maualalo i le 3 tala 38 sene i le lita faatusa i le tau sa iai i le masina faaiu o le tausaga 2023 sa 3 tala 57 sene i le lita.
O le kalasini sa 3 tala 21 sene i le lita o lea ua alu ifo i lalo i le nao le 3 tala i le lita.
