Ua faaauau nei ona suesueina le lu’i faaletulafono e ala i se talosaga ua i luma o le faamasinoga sili a le atunuu, ua finau ai ni sui o le faalapotopotoga o le SSIG poo le Samoa Solidarity International Group, e soloia le Tulafono o le faamauina o fanua o le tausaga e 2008.

O le Aso Tofi nei e valaau ai lenei mataupu mo le faia o tapenaga faaiu a o lei faatulaga le taimi e fofogaina ai mau.

Ua mafai ona faaauau lenei finauga faaletulafono faasaga i le Tulafono o le Faamauina o Fanua na pasia e le Palemene i le 15 ai lenei o tausaga, ina ua iai se loia e tauaveina le finauga a le itu talosaga lea o loo iai suafa o Nonu Ueni Fonoti, Lema’i Faioso, ma Mrs Florence Fonoti.

O le loia le tamaitai o Tanya Toailoa na poloaina i le pule a le faamasinoga, e finauina le mataupu a i latou ua ta’ua suafa ona o se mataupu e iai ona vaega ma’ale’ale faaletulafono e na o se loia na te mafai ona finauina.

Mo le silafia e toatele sui o le SSIG sa latou lagolagoina lenei finauga i le taimi na faato’a oo ai i le faamasinoga, peitai ua na o le toatolu i latou ua faamauina suafa i le talosaga autu ma nisi toaitiiti o sui lagolago o loo mau pea le toovae i o latou finagalo e faaauau lenei finauga faaletulafono.

O le autu o le mataupu lenei o loo finau ai le itu tagi o le Tulafono o le faamauina o fanua o le tausaga 2008 ua aveesea ai o latou aiātatau mai eleele faaleaganuu e faamauina i lalo o lea Tulafono.

O le Loia Sili a le Malo o loo faatūtū iai le finauga a le itu talosaga.