O loo tulaga lelei pea le siitia o tupe maua mai le atina’e o tagata tafafao mai i Samoa e tusa o faamaumauga lata mai o le tausaga faaletupe fou o loo faagasolo talu mai le masina o Iulai o lenei tausaga.
O le masina o Aokuso na faamauina ai le siitia o tagata tafafao na afea le atunuu e 17,248 o se siitaga e 4 tesimale 7 pasene pe a fua ia Aokuso o le tausaga na te’a nei 2023 e 16,471 tulisi na malaga mai i le atunuu i lea masina.
O le masina foi o Iulai o lenei tausaga sa faamauina ai le 10 tesimale 2 pasene na siitia ai tagata tafafao mai i le atunuu ma o se vaaiga taulai lea i le faaauau pea o tulaga lelei o lea atina’e.
O tupe maua mai tagata tafafao mo Aokuso o lenei tausaga ua faamauina i le 58 tesimale 9 miliona ma o se siitaga e 6 tesimale 1 pasene pe a fua ia Aokuso o le tausaga na te’a nei sa faamauina tupe maua i lea masina i le 55 tesimale 5 miliona tala.
I le maketi o tagata tafafao mai mo Aokuso e 47 pasene ua siitia ai, ae o tagata sa malaga mai ai e pei o tauaiga ma uo e 31 pasene.
O tagata sa mafua ona malaga mai i le atunuu ona faiga faapisinisi ua faamauina le maualuga tele o i latou na afea Samoa ia Aokuso lava e 84 tesimale 2 pasene.
O Niu Sila sa pito to’atele tagata na malaga mai ai e 41 pasene i le aofaiga e 7,068.
