E leai se suiga i le aofaiga o le vaegatupe ua pasia e le Malo e ala mai i le Kapeneta mo le polokalame masani o fesoasoani i aoga uma i le atunuu, e aofia ai aoga a ekalesia, aoga tuma’oti, o aoga o matata eseese, aoga amata, o aoga mo i latou e iai manaoga tumau, aoga mo fanau ua sauaina ma aoga a le Malo.
O le vaiaso muamua o le masina fou o Me e amata faasolo ai le faasainiina o ulu aoga ma peresetene o komiti o aoga taitasi mo le tuaaoina iai o a latou vaegatupe mai le fesoasoani lenei a le Malo na amata faatino i le tausaga e 1984 ma o loo faaauau pea.
E 342 aoga uma i le atunuu o le a oo iai le fesoasoani ma le fuafuaga talu mai le tausaga ua mavae, o aoga e ese mai i aoga a le Malo, o le 60 pasene o le fesoasoani tupe e alu i totogi o faiaoga ae o le 40 pasene e faatupe ai isi fuafuaga e pei o meaaoga a le fanau.
I le tulai mai o le faigamalo a le vaega faaupufai o le Faatuatua i le Atua Samoa ua Tasi, e 17 miliona 700 afe tala na tufatufa i le tausaga na tea nei mo lea fesoasoani.
Ma ua faaauau pea lea aofaiga o tupe mo le polokalame i le tausaga nei.
