O le toe tatalaina o tuaoi faavaomalo o Samoa i le aso muamua o le masina o Aukuso, o le a faaaogā ai auaunaga ma tautua a isi kamupani vaalele o loo afea le atunuu e pei o le Air New Zealand ma le Fiji Airways, ae o le toe iai o se vaalele tele o le Samoa Airways mo ia malaga ua mautu le faaiuga a le Malo ua toe faafoi le vaalele 737-800.
Ua faaalia e le taitai o le Malo o loo galulue pea le komiti ua tusiaao iai le Kapeneta latou te faia gaioiga uma mo le toe faafoi o lea vaalele ae mo se isi fuafuaga e iai se vaalele mo malaga agai atu i isi atunuu e pei o Niu Sila ma Ausetalia e lei mautu lea tulaga i le taimi nei. O lea ua amatalia suiga ma teuteuga o poloaiga o vavao o le faama’i mo le isi lua vaiaso ua toe foi ai le faatinoina o galuega tau femalagaa’iga i kamupani vaalele ma ofisa malaga, ma ua faaaogā ai fesootaiga tau initaneti mo le sailia o avanoa i malaga a vaalele.
I malaga i le va o Samoa e lua o le vaiaso nei ua toe faia malaga a le Lady Naomi i tulaga masani, ma ua le gata i le aveina o uta ae faapea foi ona tatala ai ma pasese e faimalaga i le va o Apia ma Pago Pago, peitai e faatapulaa tagata malaga ona o tulafono faalesoifua maloloina e mafua i puipuiga o le faama’i Koviti-19. E faamalosia foi le faailoa o pepa tui ma faia suega e faamaonia ai o loo saogalemu le tagata malaga mai le siama o le faama’i.
Ua faailoa e le faalapotopotoga o vaa a Samoa o malaga ua toe tatala ai ma pasese e mo na o se taimi lē tumau. O le po o le Aso Tofi nei le malaga a le Lady Naomi.
