Ua atoa nei le masina talu ona maliu le alii Satini, Māmea Peniamina Perite a o faatino ai galuega i Fasitoo Uta, ae o lea lava e molimauina le manatua pea e le toatele o faalapotopotoga ma ofisa i fafo o lenei alii leoleo.  

I Ausetalia, na faatino ai se faaaloalo o lea malo e tauala atu i le tamaitai Komesina Maualuga ma sui o le Australian Federal Police ma sui o le Matagaluega o Leoleo, Falepuipui ma le Toe Fuataina, faapea le tamaitai ia Emily Clark, o lē sa avea ma Komesina Maualuga o Ausetalia i Samoa na auai faatasi auā lea faaaloalo tāua ua faia mo Peniamina Perite.  

O lenei faaaloalo sa faatino ma faataunuuina i le nofoaga o loo fai ma faamanatuga o le toatele o Malu o le Malo o le atunuu o Ausetalia i le aai o Canberra poo le National Police Memorial.  

O le faaaloalo e manatua ai pea Māmea ma lana tautua i le atunuu.   

I Samoa, o le amataga o lenei vaiaso sa faatino ai sauniga o Māmea ma lana Matagaluega o Leoleo, faia i Tafaigata i le nofoaga fou mo a’oa’oga a leoleo, le Samoa Police Training Academy, a o lei molimoli atu lona tino i si ona aiga i Safune i le motu tele i Salafai mo ona toe sauniga i le asō.

Na auai uma atu ai foi le toatele o malu o le malo, faapea le Pulega e faamavae atu ia Māmea Peniamina Perite, sa latou galulue.  

Na molimauina foi le faatino ai o se tula’i faaaloalo mo le taimi mulimuli sa faaituala lua ai le Matagaluega i le aso ananafi ma faatofā ma faamavae atu ai i le alii satini.  

I lona soifua galue, o le susuga i le malu o le malo ia Māmea Peniamina Perite ua 15 tausaga talu ona tautua i le puipuia o lona atunuu (2009-2024).

Sa tautua foi o ia i galuega o le tausia o le filemu a Malo Aufaatasi ma nisi o sui e to’aono o le ofisa, le Peacekeeping UN mission i le malo o South Sudan mai le tausaga 2016 agai le 2018 i le aai o WAU.

A o iai i South Sudan, na manumalo le alii satini i le pine auro i se taamilosaga piliati i WAU ( Wau’s Pool Championships) ma lana paga, le alii sa avea ma satini i lena taimi ia Viliamu Siailepata, o lea ua avea nei ma A’oa’o i le Kolisi Faafaifeau i Malua.

O Māmea o se tasi o poutūtoa o le Matagaluega o Leoleo i le faatinoga o galuega i le latou va ma le Matagaluega o Faamasinoga e patino lava i mataupu tau fasioti tagata poo le homicide.

Ua na o ia foi le leoleo e nafa ma le faafesoota’iga o le Pule o Maliu i lipoti ma suesuega o ni maliu lilo a le Matagaluega.

E maliu Māmea Peniamina Perite ua 38 le matua o lona soifua.