O le amatag o le masina ua mavae na faia ai le faaaliga o le maketi o moa Samoa i Upolu, o le aso lea o loo faasalalauina ai lenei faamoemoe o loo faia lea i le maketi i Salelologa i Salafai.
E pei ona faaleo e le Minisita o Faatoaga ma Lafumanu, Laaulialemalietoa Polataivao Fosi Schmidt i le faaaliga sa faia i Upolu e ao ona faia foi i le motu tele i Salafai.
Na saunoa Laauli i le faaaliga o Savaii ina ia faasoa i le au fai lafumanu ma soo se tagata i Savaii e tusa o le faamoemoe a le Malo.
“Ua lē manofo le Matagaluega lenei i le sailia ai o auala e faatupulaia ai lenei mea taumafa a lo tatou atunuu ona ua tele le faalagolago o tatou i moa mai fafo e taumamafa ai.
“Peitai e lē o se mea fou i la tatou tu ma le aganuu faa-Samoa e fai a le lafumanu a le aiga ia ae ua alu alu ua tatou lē toe tepa i itu ia e fafaga ai lava moa a le aiga ia e tausi ai taumafataga i aso uma.
“O loo iai pea le avanoa i le mamalu o le atunuu tatou te toe foi ai mea sa ola ma ua masani ai o le faamoemoe foi lena o le tatou faigamalo.”
Na ta’ua foi e le Minisita o loo iai le matafaioi foi o loo faatino i le Matagaluega e pei ona iai lenei vaitau ma le atamai tau tekonolosi e pei ona iai masini e tuufua ai moa.
“O le mafuaaga lena o le aso lenei e avatu tamaimoa e fafaga ia lelei, ma a maua fuamoa e momoli mai i le ofisa faatuufua i masini ia vave ma maua nisi tamaimoa.
“A o faalogologo mai a tatou faifaatoaga ma lafumanu e lē o se mea e tau a’o, o mea masani lava na tatou feola mai lava ma o tatou mātua e fafaga moa ma fafaga puaa.”
O le polokalame lenei o loo vaavaalua lea ma se tasi o polokalame o loo faipaaga ai le Matagaluega ma le Malo o Saina e ala lea i nisi o metotia ma masini faaonaponei.
