O le asō e atoa iai le vaiaso talu ona tulai mai le faalavelave mata’utia lea na maliliu ai alii e toalua mai Samoa sa iai i Ausetalia mo galuega faavaitaimi.
Ma i se tasi o faatalatalanoaga a le ABC Pacific ma le Peresitene o le United Pasifika Community i Victoria, le afioga ia Te’o Anthony Sofe, na faaalia ai ona faanoanoaga i le gaioiga na faatino e se tasi i le taimi na tulai mai ai le faalavelave.
Ma i gaioiga nei na vave iloa ai e aiga o ē na faamanu’alia le tulaga o loo iai o latou tagata.
Ta’ua e Te’o o le tulaga e faanoanoa ai, o le maua e nai aiga o loo i Samoa tala ma ata i luga o upegatafailagi poo le social media, ae e lei faatino galuega e tatau ona fai e i latou o loo fai ma sui o aiga i Ausetalia.
Faasoa le peresitene, e lei maua lelei se taimi e talanoa ai i latou ma nai aiga, ae o le tuuina atu o se tala e talia gofie e finagalo ma loto o auaiga i le faalavelave ua tulai mai nei i alo ma fanau.
O lea faalavelave na tulai mai i le Aso Lua o le vaiaso ua tuanai atu, ina ua taumafai le alii avetaavale e tipi le taavale o loo i ona luma, ma o lea na taavalevale le pasi ma feto’ai ai ma se laau.
E toalua alii ua maliliu, o Samoa uma ma na galulue uma i galuega faavaitaimi.
O lea ua molia nei le alii o Fu’a Moananu, e 25 tausaga le matua i le avetaavale mata’utia.
Na ta’ua e Te’o Anthony Sofe o loo latou galulue faatasi nei ma nisi o a latou paaga e tuufaatasia nisi o faalauiloa poo awareness e faamanino ma faamalamalama i tagata e agai atu i galuega faavaitaimi i le telē o le eseesega o ala tetele i Samoa ma Ausetalia, ae faapena ai foi ma le saoasaoa faatapulaa e tatau ona alu ai le taavale.
Faasoa foi le alii peresitene o loo taumafai pea ia ma le toatele e faafesootai i aiga a i latou ua aafia nei.
Puna o Faamatalaga: https://www.abc.net.au/pacific/programs/pacificbeat/samoa-bus-deaths/104042210
