I le silia ma le fā tausaga talu ona maliu se teineititi 18 tausaga le matua na fafano lona ma’itaga ma ave ai i le falemai i Tuasivi, mulimuli ane faia suesuega a leoleo ma ave ai le teineititi e vaai e le Toomaga mo ē Puapuagatia.

O le Aso Lua o le vaiaso nei faatoa valaau ai molimau a leoleo e lagolago ai moliaga o lē o loo molia i le solitulafono o le faiaiga fai faamalosi le rape.

O le tamā o lē ua maliu o loo tuuaia.

O le faamatalaga a le teineititi na tuuina atu i leoleo a o lei fano lona soifua, sa ia faamatala ai le gaioiga a lē ua molia na faatino ia te ia.

O le faatoa gagana ai lea o le teineititi ma faamatala ona aafiaga.

I le faamatalaga a le teineititi na faasalalau i le itulau o fesootaiga a le Toomaga mo ē Puapuagatia a o lei maliu, o loo ia tautino ai e lē tatau ona tupu i se isi alo teine pei o ia le tulaga na aafia ai.

Ae i taumafaiga e ala i polokalame faalauiloa e tetee atu ai i le sauaina o tina ma tamaitai ma fanau teine o le atunuu, o le vaiaso nei ua amata faagasolo ai le polokalame o le 16 aso o faalauiloa e tetee atu ai i sauaga poo le 16 days of activism to end violence against women and girls.

O se tasi lea o taumafaiga faavaomalo e tafiesea ai soo se ituaiga o sauaga faasaga i tamaitai.

O le aso 25 o Novema seia tau atu i le aso 10 o Tesema e faagasolo ai lea polokalame faalauiloa na tatala e le tamaitai Minisita o le Matagaluega o Tina ma Tamaitai Atinae o Afioaga ma Agafesootai i le Aso Gafua o lenei vaiaso.

O se aso faamanatu o loo galulue ai ma le faalapotopotoga o tina ma tamaitai o Malo Aufaatasi le UN Women faapea le faalapotopotoga o le Civil Society i Samoa.