A o faaauau ai pea ona faatalia faamaoniga o nisi fusuaga e sosoo ai a le alii o Joseph Parker, ua ta’ua i lipoti a le Newshub i le asō ua faailoa e Parker nisi igoa e lua e ono avea ma ana paga.

Ua 31 tausaga le matua o le alii fusu ma sa ia faaleo foi lona toe fia foi ane i le maea i le masina o Mati.

Fai mai le lipoti ua faailoa e Parker i le Talk Sport o loo fia fusu foi a lē o le alii Croatia o Filip Hrgovic poo le alii fusu mai Saina o Zhilei Zhang.

Na ta’ua e Parker o igoa uma ia sa faailoa ane ia i latou ma ua tali iai i le ioe.

O Hrgovic ua 31 foi tausaga o lona matua, ma o loo numera tasi nei i le IBF division ma ua 17 ana fusuaga na manumalo uma ai, ma e 14 malo i le knockout.

O le isi e suafa ia Zhang e 40 tausaga le matua, na ia ta’ua e fia fusu foi ia Parker ma o loo ia umia nei le interim title o le WBO lea o loo tulaga tolu ai Parker i le taimi nei.

O loo faatalia foi la feutanaiga ma ia alii poo ai o le a muai laa i totonu o le maea ma Joseph Parker.