Ua faailoa e le Matagaluega o Punao’a Faalenatura ma Siosiomaga le maua e itumalo o Lotofaga ma Vaa o Fonoti o ni faamanuiaga pe a lelei ona latou puipui le saogalemu o le nofoaga vailaloa i Vaipu.

O lea tulaga tāua o loo faailoa i se pepa o faamatalaga na faalauiloa i le aso faapitoa mo suavai, vaomatua, o nofoaga vailaloa poo eleele faataufusi, ma vai lafoai.

O se sailiiliga na faia i le masina o Mati ma Aperila o le tausaga e 2017 ma faatino mulimuli ai ni faatalanoaga ma aiga o alala latalata i le nofoaga vailaloa i Vaipu, na fausia ai se faiga paaga ma ia itumalo e lua e galulue faatasi ai ma le matagaluega o puna’oa faalenatura ma siosiomaga.

E mafua lea ona sa faamaonia i le suesuega ma le sailiiliga na faia o loo lelei atoatoa ma mamā le suavai mo le faaaogaina o se vai e inu.

O le okesene foi i le suavai o loo lelei atoatoa e tusa o taiala a le soifua maloloina o le lalolagi.

Ua faagasolo ai nei ni polokalame e faatumau ai pea le lelei o le suavai mai lea nofoaga ua galulue ai le matagaluega o puna’oa faalenatura ma le siosiomaga ma aiga o ia itumalo e toe totō laau e puipui ma faasao ai le vailaloa i Vaipu o se tasi o nofoaga i Samoa e pito tele ni fanua o loo aofia ai i totonu.