Ua faailoa i lipoti i le aso e iai nai tamaiti a’oga i Niu Sa Uelese o loo a’ooga i le aso i potu a’oga o le a silia ma le 30 tikeri le vevela i le vaiaso nei ona o loo faatali pea mo le faapipiiina o ‘ea mālūlū i potu a’oga.
Fai mai le ABC o le polokalame a le faigamalo a le setete o Niu Sa Uelese le Cooler Classrooms Infrastructure na amata mai i le 2018 lea e faaalu ai le 500 miliona peitai e 13 a’oga e oo mai i le taimi nei o loo faatali pea mo le faapipiiina o ‘ea mālūlū.
O se popolega tele lea ua toe faapupula mai e mātua ma nisi o faalapotopotoga o mātua ma faia’oga i le vaiaso nei ina ua toe amatalia a’oa’oga a le fanau.
E silia ma le 900 a’oga na ioeina le faapipii ai o ‘ea mālūlū fou i potu ma faletusi e pei ona faailoa e le matagaluega o a’oga peitai a tuufaatasi a’oga e le’i oo lava iai lea fuafuaga ua faailoa e le ABC e 52.
Fai mai mātua e lē atoatoa ai foi le a’oa’oina o tamaiti i tulaga ia ma e lē gata i le lē lelei o tulaga o loo a’oa’oina ai ae o aafiaga foi e ono iai i lona soifua mālōlōina.
Fai mai le faigamalo a le setete ua mae’a faapipii ‘ea mālūlū i potu a’oga e 2324 ma faletusi i a’oga e 152 i Niu Sa Uelese ae o loo faasolo pea le galuega.
Puna o Faamatalaga: https://www.abc.net.au/news/2025-02-24/nsw-cooler-classrooms-students-learning-heat-temperature/104951660
