Ua toe tolo atu i le masina o Iuni le mataupu tau faamasinoga o loo molia ai e leoleo Lise Marie Schmidt, e mafua i se tusi na ave e lē ua molia i le Loia Sili a le Malo.

O lea tusi sa faailoa ai ni tuua’iga o le iai o ni aafiaga o le ta’ita’i o le Malo le tamaitai Palemia i le maliu o le tamaitai polofesa o Dr Caroline Sinavaiana Gabbard.

O se isi foi tusi a Lise na ave i le Ao o le Malo e faatatau lava i ia tuua’iga, lea ua faailoa e leoleo o ni tuua’iga e lē moni ma e taufaasese.

O le Aso Lua o lenei vaiaso na tula’i ai Lise i le faamasinoga i le valaauga muamua o moliaga peita’i, ua faailoa e le itu a leoleo e le’i mae’a ona faamautū a latou moliaga.

Ua toe tolo ai le mataupu i le masina o Iuni e aunoa ma se tali a lē ua molia.

E leai se loia na tula’i mo Lise Marie Schmidt.