Ua aumai i se tulaga faalauaitele se pepa o faamatalaga mai le sui Kovana o le Faletupe Tutotonu o Samoa (Central Bank of Samoa) le susuga Gilbert Wongsin ua faasa’o ai sese i se lipoti na faasalalau e le nusipepa o le Samoa Observer, sa ta’ua ai o se iloiloga poo se review talu ai nei a le Iuni a Europa le EU (European Union) o loo faailoa ai o Samoa le isi atunuu o loo i le lisi a lea iuni o loo aafia i faiga solitulafono faasino i tupe eleelea poo money laundering. 

Ua faailoa e le sui Kovana o le faletupe totonu o le atunuu, e sese ma lē sa’o le lipoti.

Faaalia e le sui Kovana o le lisi o loo faasino iai le lipoti a le nusipepa, o le lisi o atunuu e lē tuuina atu se latou lagolago i le faailoaina o faamaumauga tau lafoga lea e ta’ua i le gagana Peretania, o le List of non-cooperative jusrisdictions for tax purposes.

I le avea ai ma sui o le Asia Pacific Group ua faaalia e Gilbert Wongsin le sui Kovana, ua maualuga le tulaga lelei o gaioiga a Samoa ua faatino e tali atu ai i faafitauli ma faaletonu e aafia ai le mataupu i tupe eleelea.

E pine faamau lea tulaga lagolago o Samoa i se teuteuga o le Tulafono tau tupe eleelea 2007, lea na faia i le tausaga e 2018 ia teuteuga. 

O le taimi nei o loo faaauau pea ona faia e le Malo o Samoa tulaga uma e faaleleia ai ana galuega uma tau tupe, ina ia ausia manulauti ma taiala o tulafono faavaomalo o loo puipuia ai atunuu ma le aafiaga o tagata mai gaioiga tau tupe eleelea.