E lē o faate’ia le taitai o le NZ First i le faaiuga o le palota faapolokiki a le 1News o lea ua ausia e lana pati le 5% e mafai ai ona toe foi mai i le Palemene.
O le tali mai lea a Winston Peters, ma e le gata ua fai e lē o te’i, ae o lea foi ua pasi mamao ma le 5% le lagolago a tagata ua iai i le taimi nei mo le NZ First.
O le faigapalota i le 2020 lea na faia ai sina koma a le pati a le NZ First ina ua lē ausia le pasene e mafai ai ona toe foi mai i le maota, ma a o toe tasi ai le masina faia le palota tele a Niu Sila, o lea ua toe sausau mālie i luma le vaa o le NZ First.
Faaiuga o le palota faapolokiki a le 1News faailoa mai ananafi o lea lava o loo tumau le maualuga o pasene e mafai ai e le National ma le ACT ona osi se faigamalo, ma e lē o maua ai se avanoa mo Winston Peters ma lana pati e ono sau ai i totonu.
E oo mai lava i le taeao nei, e lei manino lava se faaiuga a le taitai o le National Christopher Luxon pe manao ia Winston Peters pe leai, a o David Seymour o le ACT e lē o suia lava lana leai.
