A o toe lagona ai siufofoga o ta’ita’i Pasefika ia sa’oloto le feoa’i o tagata Pasefika e fia omai i Niu Sila, o loo lagolago malosi e le faipule ia Teanau Tuiono.
O Tuiono o ia foi lea na tu malosi i le tulafono lea ua toe agavaa ai nisi o tagata matutua Samoa i sitiseni Niu Sila poo le Restoring Citizenship Removed by Citizenship (Western Samoa) Act 1982, lea na aloa’ia mai ia Novema o le tausaga faato’ā uma atu.
E lē fou le faatalosaga e le Pasefika o le feoa’i mai i Niu Sila e aunoa ma ni visa, e pei ona faatalosagaina foi e le Palemia o Fiti i le 2023, faapea le Palemia o Samoa o loo iai nei, Fiame Naomi Mataafa.
Ae i le finau a Tuiono, e lē fetaui le faamatuu atu o visa waivers i atunuu e mamao ese mai le itulagi o loo iai le Pasefika, ae o lea e lē o iai se avanoa e agavaa ai atunuu Pasefika o loo nonofo faatasi ma Niu Sila.
E oo mai i le taimi na tuufaatasia ai tala o le taeao nei, ua silia ma le 10 afe saini o le petition a Arthur Anae lea foi o loo finauina ai le mataupu lava lenei e tasi.
E ese mai ia Niu Sila, o lea foi ua iai le talosaga mo feoa’iga sa’oloto e tau lē moomia ai ni visa malaga mo le feoa’i atu o tagata Pasefika i Ausetalia.
Puna o Faamatalaga: Green Party MP advocates for visa waiver access for Pacific nations | RNZ News
