Ua atoa nei le 5 masina talu ona sainia ma amata aloa’ia le konekarate e oo atu i le miliona tālā Niu Sila le tau, o le faavaeina o se polokalame mo le faia o tuipuipui a fanauiti ; ae i faamaumauga mai lipoti o lenei fuafuaga, o loo faamauina ai le maualalo o le numera o fanau ua faia tuipuipui mai lea polokalame, faapea e lē atoa se selau o le numera o fanau.
O nei faamaumauga na maua mai i se lipoti na liki mai i tua i le vaega o ‘aufaasalalau a le leitio faavaomalo a Niu Sila le (RNZ) e faapea e na o le to’a limasefulutolu fanau ua faia tuipuipui e oo mai le aso 17 o le masina o Mati.
Manatu le ‘ausu’esu’e ua maualalo tele lenei numera.
Ma o le tasi o autū o le faavaeina o lenei fuafuga ina ia fesoasoani atu i fanauiti e lē o faamauina i polokalame tau i le soifua mālōlōina poo le primary care, peitai e ta’ua mai o le to’atele o fanau o loo lipotia i le polokalame miliona tālā lenei o loo iai poo loo gafatia le iai o se foma’i e na o le to’atasi le tamaitiiti e lē o iai se foma’i (GP).
Ae e ui i le maualalo o lenei numera, ua faaalia e le Ofisa Sili o le Pulega o le Whānau Āwhina Plunket o loo iai lava lona faatuatuaga i le polokalame ma o loo alualu i luma le faatautaiga ma le faatinoga o le polokalame talu ona sainia le konekarate ma le Pulega o le Soifua Mālōlōina i le atunuu le National Public Health Service (NPHS).
Ma e manatu le tamaitai Ofisa Sili ia Fiona Kingsford, o loo faasolo pea ona latou galulue vaavaalua ma le Pulega o le Soifua Mālōlōina ina ia mausalī auala ma ta’iala i le faatautaia o galuega mo tuipuipui ma i lona iloa o le a vave ma faatupula’ia le numera o fanau o le a fai tuipuipui i se taimi e lē o toe umi.
Talu ona faavae mai lenei fuafuaga, o lea ua 5 aai ua faatino ai le polokalame e pei ona iai le aai Whangārei, Kaikohe, Taumarunui ma le lua o lālā i Hamilton.
Ua lipotia o le isi 5 o loo faamoemoe e faia i le aai o Whanganui, Paeroa, Taihape, Te Awamutu, faapea ma Masterton.
O le naunauta’iga a le malo i le faavaeina o lenei polokalame, ina ia oo atu i le tausaga 2030 ua ausia le mae’a faia uma o tuipuipui o le oo atu i le 95% o fanau e ta’i lua tausaga le matutua.
Ma le faanaunauga ia oo atu i le masina o Iuni o le tausaga nei 2025 ua ausia le 84% o fanau ua faia tuipuipui.
Puna o Faamatalaga: https://www.rnz.co.nz/news/national/558827/plunket-scheme-vaccinates-fewer-than-100-babies-in-five-months
