O le taumafa tapaa, vape poo le faaaogāina o le mariuana e iai lona sootaga i le tele o le avanoa e aafia ai oe i le gasegase o le fatu pe stroke foi, tusa lava pe lē o iai ni faaletonu i lou fatu pe e lē masani foi ona e taumafa tapaa pe tagofia foi le vape, o le iuga lea o se suesuega fou ua faalauiloa mai nei.
Ua ta’ua ai e leai lava se eseesega tele o lou taumafa i le mariuana ma le tapaa se’i vagana le ituaiga drug lea e faapuupuu o le THC poo le tetrahydrocannabinol ma ua faailoa e i latou sa feagai ma le suesuega, ua iloa nei e iai aafiaga o le taumafa o le laau faasāina o le mariuana, e iai ona lamatiaga e pei lava foi o lou taumafa i le tapaa.
E tāua faamaumauga nei auā ua siitia pea i latou e faaaogāina le laau faasāina.
Ua toe faamamafa ai ma iuga o se tasi suesuega sa faia talu ai nei na iloa ai o le faaauau pea i aso taitasi o le taumafaina o le mariuana e iai lona aafiaga i lou fatu e ono gasegase ai i le oso o le fatu poo le stroke.
Ua ta’ua o le iuga o le suesuega sa faia ma lomia i le Journal of the American Heart Association na iloilo ai faamaumauga o tagata e 43 afe, tagata matutua mai le 2016-2020.
O i latou ia e amata mai i le tai 18 tausaga e oo atu i le 74 tausaga le matutua.
