Fai mai le toalua o si alii laufali lea na faaoolima iai se tagata i le faaiuga o le vaiaso i le mae’a o se taaloga soka, e le taitai lava ona taofia lona toalua mai le faatinoina o se mea e fiafia e fai, o le avea lea ma laufali. 

E tele manu’aga o le alii o Khodr Yaghi na maua mai osofaiga ma faaoogalima a se tasi alii taalo i se taaloga na faia i le itu i Saute i Sisifo o Sini i le faaiuga o le vaiaso.

Na faia’ina ai le Greenacre Eagles i le Padstow Hornets ae fai mai si laufali o lona manatu ua oo mai le oti ia te ia.

O vaaia i luga o le televise le taimi na osofaia ai si alii laufali e fai si ogaoga o manu’aga ma e toafa si ana fanau tama ae fai mai lona toalua i le aufaasalalau o lana lea mea fiafia o le laufaliina o taaloga.

O loo taofia i le falemai le alii laufali ae o le alii lea na feta’ua’ina sa faatinoina le faaoogalima e suafa ia Adam Abdullah, ua molia nei i le faaoolima faamoemoeina ua mafua ai manu’aga i le tino.

Fai mai le lipoti o le ono vaiaso talu ai na aofia ai foi le tagata lava lea e tasi i se vevesi na tupu a o faia foi se isi taaloga soka.