Ua saunoa le failautusi aoao o Malo Aufaatasi, Antonio Gutteres ua iai nei le lalolagi i le faitauga faai’u o le faaitiiitia o le siitia o le vevela, sana faamatalaga ua faia i le fonotaga tele e faatatau i le tau o loo usuia i Azerbaijan.

Faailoa e Gutteres i lana tautalaga i ta’ita’i o atunuu o le 2024 ua vaaia ai se tulaga ese i le tau ma mea ua faaleagaina, ua faamauina ai le aso aupito vevela i le lalolagi ma e foliga foi o le tausaga aupito vevela lea ua iai.

Ta’ua e le failautusi o le fonotaga lea a le COP29 ua faaigoa o le Finance Cop.

O atunuu tau atia’e o loo finau mai e fia faia se fesoasoani i suiga o le tau peitai e mana’omia le fesoasoani tau tupe e faatino ai.

Fai mai Gutteres o aiga ua vaaia le faavave e tapena ese pe a tau sau se afā, faaleagaina le tele o mea ma soifua ua fano mai faalavelave faalenatura, aemaise o le mativa ma le fia aai i nisi atunuu.

O nei mea uma ua atili una’ia i gaioiga fai a le tagata ma e leai lava se atunuu o sao mai ai.

O le mau’oa ua mafua ai le faaletonu ae totogi ai lava e le tagata mativa se tau maualuga tele.

Saunoa Gutteres e tatau ona faia tiute o atunuu uma ae tatau ona taulamua ai le G20 o latou ia o loo tele le kasa o loo faaalu ane ai i le siosiomaga, na ia ta’ua foi o tupe o loo faamatuu atu mo le tau e lē o ni tupe tufa fua ae o se tupe inivesi.

O le faia o gaioiga mo le tau climate action e lē pule ai oe i sau filifiliga, o le mea e ao ona fai ma o loo tātā lava le vae o le uati.

Puna o Faamatalaga: https://www.rnz.co.nz/international/pacific-news/533605/cop29-un-chief-warns-world-is-in-final-countdown-to-limit-global-warming-to-1-point-5c