Ua aveesea nei le tapu i le sone puipuia o ogasami o nuu o le atu Safata sa taofia ona fagotaina talu mai Oketopa o le tausaga ua mavae, ma ua mafai ai ona aga’i tagata o ia afio’aga e fagota le aloalo ma isi ogasami sa faasā.
Peitai o loo tumau pea ona tapu le tusa o le 2 kilomita faataamilo mai le ogasami o loo goto ai le manuao o le Manawanui, lea o loo matua faasā ni tagata ona uia, o ni vaa fagota faapea ni drone mo mea pu’eata faalele ona oo iai.
O se tala fiafia lea mo le to’atele o aiga o nuu o Safata e faalagolago tele i faigafaiva e maua ai tupe ma le tausiga o le tino i meataumafa mai le sami.
O le Aso Lua o le vaiaso nei e pei ona faailoa e le matāgaluega o galuega tetele a le malo o loo vaaia le galuega o le aveesea o suāuu mai le manuao, na faailoa atu ai e le nofoaga o su’esu’ega faasaienisi le SROS le saogalemu o ogasami ua aveese ai le tapu.
Ua faailoa e le sui o le fitafita o le puipuiga a Niu Sila o Commodore Andrew Brown i se pepa faalauiloa, o le tulaga ua iai le galuega o le aveesea o suāuu mai le manuao, o le aveesea o le tapu mai se vaega tele o le ogasami o loo goto ai le Manawanui, o le taunuuga lea o su’esu’ega a le nofoaga faasaienisi a Samoa ma o le a tuuina atu ai se lipoti i le malo o Niu Sila ma le malo o Samoa mo le isi laasaga e sosoo ai.
