Ua faamaonia mai nei e ala i auala o fesoota’iga televavave poo upega tafa’ilagi le social media a le Ofisa o le Amepasa i Jakarta Indonesia, le faalauiloa ai o le avea o Taulapapa Phillip Taula ma Amepasa o Niu Sila i totonu o le malo tele o Indonesia.
Na feiloa’i atu lea tamalii i le Peresitene o Indonesia ma tauaaoina atu iai ana tusi taualoa, poo letter of credentials, auā le amata aloa’ia ai o lana tautua.
I lea faasalalauga na faamauina ai, e lē o se taimi muamua lea ua tautua ai Taulapapa Philip Taula i totonu o lea atunuu.
Ua faamauina sa tautua Taulapapa i Indonesia mai le tausaga 1999 i le tausaga 2002, i galuega faapolokiki.
O Taulapapa o se alo o Samoa, ma ua telē foi lona sao ia Niu Sila, i le tautua ai o se Komesina Maualuga i nisi o atunuu ma sa ia tautua foi mo Niu Sila i lalo o galuega a Malo Aufaatasi poo le UN i Niu Ioka i Amerika.
Puna o Faamatalaga: New Zealand Embassy – Jakarta, Indonesia
