Ua tatala aloa’ia nei le nofoaga ua avea ma nofoaga autū o a’oa’oga o le taaloga siisii u’amea mamafa mo atunuu o le Oceania, e pei ona faagaioia mai le Faletaalo Numea Tasi poo le Gym One i Tuanaimato.
O le Aso Toonai na te’a nei na tatala aloa’ia ai lea nofoaga i se sauniga sa auai atu iai faauluuluga ma pulega o le taaloga siisii u’amea mamafa i le lalolagi, ae sa auai foi le ta’ita’i o le malo ma faauluuluga o isi tino tau taaloga i Samoa.
O se tasi lea o matati’a ua ausia e lo tatou atunuu e pei ona faailoa i saunoaga autū o lea sauniga, ona o le talafaasolopito o le taaloga e le’i faigofie lona amataga, se’ia oo mai ina ua siitia maualuga le igoa o Samoa i tausinioga faavaomalo i le siisii u’amea mamafa aemaise taaloga a le Olimipeka.
O le tatalaina o lea nofoaga mo le a’oa’oina o le taaloga siisii u’amea mamafa na manatua ai ma le sao o i latou uma sa āsaina le amataga o le taaloga lenei, e pei o le susuga Seiuli Paul Wallwork.
