O Willie Vaaelua na fanau i Samoa ma malaga mai ma ona mātua i Niu Sila nei faatoa 4 ona tausaga.
O ona matua o Malagamatamalii Laupepa ma Natasha Vaaelua.
Na amata aoaoga a Willie mai i Robertson Road i Magele, faasolo mai ai i Dawson Primary ma oo atu ai ina faaiuina lona taumafai i le Kolisi o Tangaroa College.
O se alii e fiafia i le musika ma e talenia foi i le itu tau musika e pei lava o nai ona tuaa.
I ona tausaga e lua mulimuli i le Kolisi sa avea ai o ia ma kapeteni a le aulakapi 15 1A o le taimi muamua foi lea na sao atu ai le aulakapi lea a le Kolisi i le tausinioga lea o le 1A a tama aoga maualuluga i Niu Sila nei.
Na faaauau le aoga a le taulealea i le AUT i Aukilani ae faapena lava ona faaauau foi ma lana lakapi.
O se fiafiaga foi i nai ona mātua ma nai ona uso e toalua le tapua’ia o taaloga a le taulealea i taimi e taalo ai.
Peitai ane na manu’a i le tausaga ua mavae i lona tulivae i manu’aga masani lava o tama lakapi ma faatonuina ai loa ina ia faataunuuina se ta’otoga mo lona vae ona o le tulaga ogaoga o le manu’aga.
O le taimi nei o loo faamalolo ai Willie mai taaloga aemaise o ni gaioiga e ono aafia ai lona tulivae ma faaauau ana siaki faapena foi i lana physio.
O le iai o Willie i lenei vaitau o lana faiga malologa, ua maua ai lona taimi e faaaogā ai se isi o ana taleni e pei ona iai lana pese ua laiseneina ma faasalalauina i luga o upega tafailagi.
I se faatalanoaga ma le atalii, na ia ta’ua ai o le pese ua ia lagiina o lana lava lea ta’utinoga i lana savaliga faaleagaga.
Na ia ta’ua e tele faigata e uia e tupulaga talavou aemaise foi o lona tagata ae ona o le faamalolosi o ona mātua i le talitonuga faa-Kerisiano, o le ala foi lea o le maua o lona malosi faaleagaga e tali atu ai i le tele o faafitauli e aafia ai talavou e pei foi o ia.
Na ia ta’ua o lona malosiaga e iai taimi e sili ona faigata o lana savaliga faatama talavou.
Ma e lē faigofie le ola faaleagaga i le va o tupulaga talavou ae ona o le malosi o lona aiga i le Atua, o iina na maua ai foi lona malosi e faamatala ai lona olaga talavou e ala i le musika.
O lana pese ua lagiina i le gagana peretania ona o lona naunautaiga ia mafai ona oo lana feau i soo se talavou e faalogologo i ai.
O lana ia lena ta’utinoga i lana savaliga faaletalavou ma o lona faamoemoe foi lena ia avea lana molimau o se faamalosiau i isi uso ma tuafāfine talavou.
O Willie e tupuga mai i se aiga e fiafia i le musika, ae o lona tuaa foi ia Malagamatamalii Laupepa o se faipese ua leva ona faaaogāina lona soifua i totonu o ekalesia i Samoa aemaise ai o le galuega a le Autalavou mo Keriso, ma o se tasi lea vaaiga sa iai le olaga amata o Willie mai lona laititi sa masani ona o ona mātua i le mafutaga a le Autalavou mo Keriso ma feaveai.
