I le mae’a o le 16 tausaga o avea le faletua le afioga Tupa’i Tupe Ualolo ma faauluuluga o le pulega o faailogatusi ma meli a le Malo o Samoa, e lei toe talosaga i le tofiga ina ua faasalalau le avanoa o le Ofisa Sili.
Peitai o i latou sa talosaga ma faia iai le filifiliga o lea ua tusi aao le Malo e ala i le faaiuga a le Kapeneta, e see atu se isi tamalii o se tamafanau a le atunuu ua umia tomai a’oa’oina e ala i ni faailoga na te tauave le tulaga Ofisa Sili mo lea auaunaga a le Malo.
O le afioga Tavu’i Mike Lemisio, ua faamaonia e le Kapeneta lona valaauina e avea ma Ofisa Sili fou o le vaega o faailogatusi ma meli poo le Samoa Post Limited.
E filifilia Tavu’i Mike mo lea tofiga o loo feagai ma a’oa’oga i le Iunivesite a le Pasefika i Alafua mo le sailia o lona faailoga o le Masters of Business Administration.
O loo ia umia le faailoga o le Bachelor i tomai tau pisinisi ma le tausi tusi mai le Iunivesite a’oa’o o Samoa.
Sa tautua o ia i ni tausaga i nisi o auaunaga i galuega i le vaega tuma’oti poo le privater sector i totonu o le atunuu.
