O lenei polokalame na faatino i le tolu vaiaso i Iapani e agai lea ia i latou o loo faatinoina auaunaga i tina ma tamaitai i nuu ma afioaga i tua.

O lenei avanoa na auai ai se tasi o sui mai le Matagaluega o Tina ma Tamaitai Atinae o Nuu ma Agafesootai ia Sa’u Sefulu Justeap Vagai Salesulu o se tasi lenei o matagaluega o loo feagai pea ma mataupu aemaise o ana polokalame mo tina ma tamaitai i nuu ma afioaga.

I faamatalaga mai le ofisa a Iapani i Samoa nei le Japan International Cooperation Agency (J.I.C.A.), o vaega e agai ai le unaia o tina ma tamaitai e aofia ai le tulaga tau faatoaga ma le atinaeina o aiga ma nuu.

Na faailoa e Sa’u o nei polokalame e manino ai le amanaia pea o le sao ma le tāua o le tulaga o loo iai tina ma tamaitai i lenei vaitau.

“O lenei polokalame o loo faasoa mai ai le manaomia o le tāua o tina ma tamaitai i le aofia ai i tulaga o taitaiga i soo se tulaga o faiga filifiliga i totonu o afioaga ma soo se tofiga o le Malo.

“E faafetai ai le J.I.C.A. mo lenei avanoa e auai ai i lenei aoaoga e faalauaitele foi le malamalama i vaega o le soifuaga e le gata i le lotoifale, o le soifua maloloina lelei e faaaogāina ai lava resources o loo maua i lo tatou atunuu, o le itu i le tamaoaiga, o aga fesootai ma le siosiomaga o tina ma tamaitai i nuu ma afioaga i tua.

“Ae le gata i lea o avanoa tutusa e aofia uma ai ma tina ma tamaitai ma o le tāua lena o lenei aoaoga e unaia ai lou nei tagata e ala i le tomai ma agavaa ua faasoa mai e mafai ona faaaogāina i le auaunaga e ala i tofiga i totonu o le Matagaluega o loo nafa ma tina ma tamaitai ma ona atinae aemaise i tina o loo i nuu i tua.”

O loo mamafa ai i lenei aoaoga le sao tāua o tina i afioaga i tua e ala i atinae o loo faatino e pei o faatoaga ma meatotō ae peitai o le maua o avanoa i vaega uma e faatino ai atinae tau faatoaga ma le tomai faipisinisi o se tasi lea o vaega o loo tuta’ia ai le faamoemoe o tina ma tamaitai ma le naunautaiga e faatino ai.