O le Ofisa Sili o le matagaluega o puna’oa faalenatura ma siosiomaga, le afioga Lealaisalanoa Frances Brown Reupena, ma le ofisa sili lagolago o le Ofisa e pulea galuega i taimi o faalavelave faalenatura le Disaster Management Office, le tofa Fesola’i Molly Faamanatu Nielsen, na fai ma sui o le malo o Samoa i le fono lona 3 o mataupu tau faalavelave faalenatura ma le siosiomaga sa usuia i Amerika Samoa i le vaiaso muamua o Setema.
O le auai o lea usugafono mai le Samoa tuto’atasi o le ata tāua lea o le galulue faatasi o Samoa e lua i le fausia o gaioiga ma polokalame e puipuia ai atunuu ma ona tagata.
O se faatasiga na maua ai foi le avanoa o le usugafono a Samoa e faatalatalanoa nisi o mataupu tāua e fesoota’i ma tapenaga e tali atu ai i ni mala faalenatura e tutupu mai.
I se pepa o faamatalaga ua faailoa ai o le fono o le Atoa o Samoa e pei ona feiloa’i ai ta’ita’i o Samoa e lua ma soalaupule taumafaiga mo le manuia o Samoa ma Amerika Samoa, o se tasi lea o poutu i faatasiga ua auai sui o malo i Sasa’e ma Sisifo e talanoa ma saili auala e sili ona lelei e fetufaa’i ai tomai ma agavaa.
