O le tuliloaina o mataupu tau vaalele sivili sa talanoaina i fono e lua muamua ua mae’a a minisita o vaalele sivili a atunuu o le Pasefika, o le a toe talanoaina i le fono lona tolu i le vaiaso nei o loo usuia i Fiti, lea o loo auai le Minisita o Valele Sivili a le malo o Samoa le tofa Olo Afoa Fiti Vaai.
O loo malaga ai ma le Ofisa Sili o pulega o galuega tetele ma fela’ua’iga le afioga Fui Tupai Mau Simanu, ma le ofisa sili lagolago o le ofisa o vaalele sivili a Samoa le afioga Lauano Yvonne Tuioti Mariner Viliamu.
O loo malaga ai foi ma le faauluuluga o le pulega o malaevaalele a Samoa le susuga Tumanuvao Evile Falefatu.
O lea fonotaga faaminisita o loo auai ma sui o le ofisa o le saogalemu o galuega tau vaalele a le Pasefika lea e ta’ua o le PASO poo le Pacific Aviation Safety Office o loo faauluulu i se tamafanau a Samoa.
E 18 atunuu o le Pasefika o loo i totonu o le li’o o le fono a minisita o vaalele sivili a lenei faaitulagi lea o loo aofia atu atunuu e pei o Ausetalia, Niu Sila, Atu Kuki, Federated States of Micronesia poo le FSM, Fiti, Farani Polenisia poo Tahiti, Kilipati, Nauru, Niu Kaletonia, Niue, Palau, Papua Niu Kini, le Atu Malesala, Solomona, Tonga, Tuvalu, Vanuatu, ma Samoa.
Sa faafeiloa’i e le Komesina Maualuga o Samoa i Fiti le afioga Aliioaiga Feturi Elisaia le Minisita ma lana usugafono ina ua to’ai taunuu i Fiti.
O le Aso Lulu le ogatotonu o lenei vaiaso ua amatalia ai lea fono faaminisita ma le faamoemoe e mae’a i le faai’uga o le vaiaso nei.
