O tagata e faaaogāina le facebook i le Atu Solomona ua tuuina iai se lapata’iga, e moni e iai le latou aiātatau e tusia ai ni faamatalaga i luga o le social media, ae tatau ona faia ma le faaeteete.

O le lapata’iga lea ua tuu ane mai le Komesina o le faamasinoga maualuga a le atunuu, Augustine Aulanga lea.

Ua ia faatonuina ai ni tagata se to’alua e totogi ni tupe, o ni taui i se alii faipisinisi ona o le faaleagaina o ia i luga o le facebook.

Fai mai le komesina e ui o le facebook e maua ai le avanoa e fesoota’i ai, o le aiātatau e faaaogā ai ma faia ni tusitusiga poo ni faamatalaga i luga o le facebook o loo iai vaega e aiaia i le tulafono ua tuuina e faatatau i le faaaogāina o ia ituaiga auaunaga.

E tatau ai ona ‘alofia le aafia o aiātatau a isi tagata e mafai ona faaleoina i le faamasinoga.

I mataupu e 2 talu ai nei sa faia ai le faai’uga a le faamasinoga e totogi e se tasi loia talavou le 70 afe tupe a le Atu Solomona i le Ofisa Sili o se kamupani o le Solomon Motors Ltd.

Sa faatonuina ma le faatonu o le vaega o fesoota’iga a le malo ia totogi le 20 afe tupe Solomona i le Ofisa Sili lava lea ona o se isi foi mataupu tali tutusa.

Na ave ai e le Ofisa Sili lea le to’alua lea i le faamasinoga ona o le faaleagaina o ia i luga o le facebook.

Atonu e lelei foi ona fai lea ma faamanatu i le to’atele e fiafia e fai faamatalaga lē sa’o ma tuua’iga i le social media, e iai lava vaega o le tulafono e ono aafia ai.

Puna o Faamatalaga: https://www.rnz.co.nz/international/pacific-news/533451/warning-on-facebook-as-court-orders-two-people-to-pay-damages-for-defamation