Ua atoa nei le tausaga talu ona faavae se tasi o kalapu ua ta’ua o le Itu o Tane Club.
O se kalapu na faavae e tauala mai i le faigapaaga a le Samoa Cycling, le Tanu Beach Fales, o le Kolisi o Itu Tane, ma le Samoa Events.
O le faatumutumuga lava ina ia atia’e le taleni ma le agavaa o tupulaga ma agavaa a fanau aoga i le taaloga o le viliina o le uila vilivae (cycling) ae faapena ai foi ma le ‘aau (swimming) ma le tamo’ega (running).
Ua faamauina i pepa o faamatalaga, o le tasi o fuafuaga o le faavaeina ai o lea kalapu, o le mafai lea ona faasoa atu alaga’oa ma le tele o le tomai mai le faalapotopotoga o le UCI Solidarity, o se itu e lagolagoina fuafuaga ma tapenaga uma o itu tau taaloga o le viliina o le uila vilivae (cycling).
Ma o se polokame o loo lagolagoina malosi e le Oceania Cycling.
O le faavae ai o le Itu o Tane Club, o se isi lea o fuafuaga ina ia mafai ona oo atu le faasoa o alaga’oa ma tapenaga i nuu i tua o Samoa, i le ma le faanaunauga e sa’ili ma aputiputi mai alo ma fanau lalovaoa o loo iai le agavaa ma le taleni i lea fa’agatama.
I lalo o lea kalapu o loo maitauina le auai ai o fanau a le Kolisi maualuga o le Itu o Tane, fanau aoga tulagalua o Avao, Safotu ma Fagamalo.
O loo iai le naunautaiga a le kalapu e faasoa atu foi alaga’oa i isi itu o le motu o Savaii auā le atia’e o le taaloga.
Talu mai ona faavae le Itu o Tane Club i le tausaga ua mavae, ua faamauina le telē o le lagolago o le Pule Aoga a le Kolisi o le Itu o Tane, Allie Faletolu, i fanau aoga i le tau a’oa’oina o le viliina o le uila, faapea le ‘aau ma le tamo’e.
Ua tele foi polokalame ma a’oa’oga i le tele o itu e faatumauina ai le lelei o le tele o uila ma meafaigaluega ua faataunuuina mo fanau o le Itu o Tane.
