Ua faailoa e le taitaifono o le vaega faaupufai o le Faatuatua i le Atua Samoa ua Tasi le afioga i le Minisita o le kapeneta susuga Laauli Leuatea Polataivao Fosi Schmidt, le tapenaga o le faamanatuina o le Tutoatasi o lenei tausaga ua atoa ai le 60 tausaga le Iupeli Taimane, o le a faia ai se suiga tele i le faamanatu i totonu o le 12 masina amata ia Iuni seia pa’ia Me o le tausaga fou.
Ua faailoa e Laauli o le polokalame atoa o lea faamoemoe tāua o le Malo ma le atunuu o le a faalauaitele i se saunoaga mai le taitai o le Malo le afioga i le tamaitai Palemia.
Ua faailoa i se lipoti i lenei vaiaso le mae’a tuuina atu e le komiti o tapenaga o se folasaga tusitusia i le kapeneta ua faailoa ai le auivi o tapenaga, ae o le polokalame i ni sauniga o le a faatino e pei o faafiafiaga e lei faamautuina. O loo faaalia foi i lea lipoti o le masina o Setema i le taimi o le Teuila o loo fuafua e faato’ā faatino ai ia polokalame ae o le aso muamua o Iuni e pei ona masani ona faia ai, o le a avea o se aso e faia ai sauniga lotu faafetai.
O se tasi o vaega tāua o le faamanatuina o le Tutoatasi o le atunuu i lenei tausaga ona o le aso muamua o Aokuso e atoa iai ma le 60 tausaga o le feagaiga faauo a Niu Sila ma Samoa le Treaty of Friendship na sainia i le masina lava lea o le tausaga e 1962, i le tuanai o le fitu masina talu ona tutoatasi Samoa mai pulega faakolone a le Malo o Niu Sila.
