O le te’a o le sefulu i le taeao o le Aso Sa mulimuli o le masina lenei o Fepuari, na pē faafuase’i ai le eletise i le motu atoa o Upolu a o tapena toonai ma isi fuafuaga o le sapati.
Na nanati ai le aufaigaluega a le faalapotopotoga o le malosi tau eletise e sa’ili le mafua’aga lea na siaki ai laina malolosi o loo fesoota’i uma ai afi eletise i nofoaga eseese o le motu o Upolu.
Peitai na maua i sa’iliga e iai laina eletise o loo faataoto i lalo o le palapala e fesoota’i ai le afi eletise i Fiaga ma le fale eletise i Fuluasou ua faaletonu, ma sa faia loa iai galuega.
E oo ane i le 3 i le afiafi ua amata ona faaola nisi o vaega o le motu lava o Upolu ae faaauau ona motusia le eletise i nisi o vaega e aofia ai le taulaga atoa ma le aga’i i nuu ma afioaga i Sasae.
O le vaiaso ua mavae sa tula’i mai ai foi ni faaletonu i le eletise ona e lua afi fou i Fiaga ua faaleagaina e pei ona faailoa e le faalapotopotoga o le malosi tau eletise, ma sa faaletonu ai foi le auaunaga a le eletise i se vaega tele o le motu o Upolu ae e lata i le ‘afa o le valu i le po o le Aso Sa na faato’ā maua ai le eletise e nisi o nuu ma afioaga o Upolu.
O ia faaletonu ua faamālūlū ai pea le faalapotopotoga i le atunuu ona o le tutupu mai o ia tulaga ma aafia ai lana tautua.
A o motusia le eletise i le Aso Sa i Upolu sa molimauina le faaaogā o afi faaleoleo a nisi o pisinisi ma aiga.
