O le mae’a ona asia o nuu ma afioaga i Savaii i le teuteuina faamatagofie o aai ma faoāaai na savalia ai e le komiti nuu ma afioaga i le motu o Upolu.

O nuu sa ave iai malo e 56 o malo o le taupulega e autū iai a latou teuga aai, sa amata mai le itumalo o Falelatai ma Samatau aga’i atu i nuu o le Vaimauga.

Ua faapea ona faaauau atu i Tiavea i le itumalo o Aleipata itupa i lalo, taamilo atu i Siumu, o Safata, ma nuu o le itumalo o Lefaga ma Faleaseela.

O fu’a a atunuu e 56 o loo agiagia i nuu ma afio’aga ua lautogia ua faaalia e le Palemia i lana saunoaga faalauaitele i le faai’uga o le vaiaso, e iai ma fu’a a isi atunuu e ese ai, ua fefiloi faatasi ai.

O le atunuu o Isaraelu ma Saina e lē lavea i le li’o o malo o le taupulega, ae ua sisi atu ai ma fu’a a ia malo.

Ua ave ai nei le talosaga a le Palemia i nuu ma afio’aga ia fesoota’i i sui o le Malo mo le faamaninoina o lea tulaga.

O le tele o atunuu o loo avea ma sui o Malo o le Taupulega sa avea o ni teritori o le Malo o Peletania o nisi foi atunuu sa pulea faakolone foi e lea Malo i tausaga ua mavae.

O atunuu laiti o le Pasefika o loo lavea i le li’o o Malo o le Taupulega, e ese mai ia Niu Sila ma Ausetalia, o Samoa, Fiti, Kilipati, Nauru, Papua Niu Kini, Solomona, Tonga, Tuvalu, ma Vanuatu.

O lona uiga e na o le 11 lava atunuu o le vasa Pasefika e aofia ai Ausetalia ma Niu Sila o sui ia o le faalapotopotoga o Malo o le Taupulega a Peletania o loo auai o latou ta’ita’i i le fonotaga.