O se tasi lenei o vaega na asia e le Sui Peresitene a le Faletupe a le Lalolagi mo le Pasefika, Manuella V. Ferro a o iai i le atunuu lea na asiasi atu ai i le Ofisa o loo gafa ma auaunaga tau i faalavelave faafuasei poo le National Emergencies Operation Centre (N.E.O.C).
O le fale o loo faatino ai nei auaunaga na faatupeina e le Faletupe a le Lalolagia sa tatala aloaia i le tausaga 2020 lea e tuss ma le $6.4 miliona tala lona tau aofai.
Saunoa ai le Minisita o le Siosiomaga Toesulusulu Cedric Salesa Pose Schuster i lenei asiasiga.
“O le nofoaga lenei o se tasi o vaega tāua lea i le faatupulaia o le tali atu o le atunuu i fesuiaiga o le tau aemaise o faalavelave faalenatura e ala i auaunaga ma tapenaga o loo faatino i totonu o lenei fale.
“O loo iai le ofisa o faalavelave faafuasei o loo faaaogaina lenei fale ua mae’a faatotogaina i vaega faatekonolosi faaonaponei ma o loo mautu le nofoaga o loo iai.
“O lea ua iai le fale lenei ma o se avanoa lelei lea mo Samoa ia agai ai i luma tapenaga ma le tali atu i taimi o faalavelave faafuasei.”
E valu vaega ua mae’a faatotogaina auā le faatinoina o le auaunaga e aofia ai le faailoilo o se mu, water tank system, lift system, generator system, CCTV system, audio visual, air condition ma gas systems.
“O nei mea uma e tatau lava ona lelei le vaaiga ia tulaga lelei mea uma auā e alu aso sau aso ae o la e tumau lava le lelei auā lava le tautuaina o Samoa i taimi o faalavelave faafuasei.
“E avea ai lenei taimi e momoli ai le faafetai tele lava i paaga aemaise le faletupe a le lalolagi mo le lagolago i atina’e auā le manuia ma le saogalemu o Samoa i taimi o faalavelave tutupu faafuasei.”
O le malaga mai o Ferro ua mae’a ai ona asia nisi o atina’e aemaise feiloaiga ma nisi o sui o le Malo.
