O le āsia ai e le Polokalame o Galuega Faavaitaimi mai Falealili o le nofoaga o loo aumau ai i le nofoaga o le Toomaga mo ē Puapuagatia o se tasi lenei o a latou fesoasoani e tuuina atu mo i latou o loo moomia.
E pei ona faalauiloa ai e le faalapotopotoga o le Toomaga i upega tafailagi le sagisagi fiafia o alo ma fanau o loo i lenei nofoaga e ala faafiafiaga aemaise o le sasaa o le alofa tulai o sui o lenei polokalame e le gata i taumafa ae o le seleni ua foaiina.
O le Afioga Tuatagaloa Joe Annandale o ia o loo taimua i lenei polokalame e ala o avanoa e malaga ai sui mai Falealili i galuega faavaitaimi i Niu Sila ma Ausetalia lea na taitaiina lenei asiasiga i le Toomaga.
Momoli ai le faafetai a le Toomaga mo le agalelei o le polokalame auā le tausia pea o alo ma fanau o loo i lenei nofoaga.
O le asiga lenei mai le Polokalame o galuega faavaitaimi a Falealili e faaopoopo lea i le tele o asiasiga e le gata i le mamalu o le atunuu i Samoa nei ae faapea foi nisi mai faalapotopotoga, aiga ma uo i atunuu mamao sa tuuina le fesoasoani i le Toomaga.
