Ua avea nei Samoa o se tasi o atunuu tau atia’e ma laitiiti o malo o le Taupulega ua aofia i le polokalame sikolasipi a le Tupu o Salesa III, e pei ona aofia ai ma isi atunuu laiti tau atia’e o malo o le Taupulega.
O le Iunivesite Aoao o Samoa na faalauiloa ai lea polokalame sikolasipi a lana Maiesetete, lea sa auai nisi o fanau o loo a’ooga i le iunivesite i le Papaigalagala, ae faapea fanau a Samoa ma le Pasefika o loo aooga i le Iunivesite a le Pasefika i Alafua le USP Samoa Campus.
Ua faailoa e le Tupu o Salesa III i se pepa o faalauiloa o lenei polokalame, o lona naunauta’iga lea ua faavae ai lea polokalame ina ia avanoa ai fanau a malo laiti o le Taupulega e maua avanoa e faalautele ai o latou tomai i iunivesite i fafo, auā o lona talitonuga o fanau e a’oa’oina lelei o le manuia lea o atunuu ta’itasi auā o i latou o ta’ita’i o le lumanai.
O le Pule o le Iunivesite Aoao a Samoa ma le Pule o le Iunivesite a le Pasefika sa auai i le faalauiloa o lea polokalame, faatasi ai ma le Tupu o Salesa ma sui o le polokalame sikolasipi mai le malo o Peletania.
Ona o le taimi muamua lenei ua faailoa ai lea polokalame, ua iai le talitonuga o tausaga o i luma o le a faamanuiaina ai ni alo ma fanau a Samoa i ni avanoa sikolasipi i lea polokalame ua faavaeina e le Tupu o Salesa III.
