O le faaa’upegaina o sui o komiti a Fono Faavae o itumalo palota e 51 o le atunuu i tomai e faatino ai a latou galuega i le faatinoina o atina’e i le poloketi o le miliona tala mo le manuia o tagata o o latou itumalo, o se tulaga tāua tele, auā o le a tausisia ai ma ta’iala o pulega lelei i le faamaumauina o faamatalaga i le faaaogāina o tupe o le poloketi, ae o le saunia foi o lipoti e faailoa ai faamatalaga uma o le faaaogāina o seleni o le miliona.
O itumalo palota o le Vaimauga 1 ma le Vaimauga 2, sa auai sui o a latou komiti o Fono Faavae i se a’oa’oga i le vaiaso nei, sa faatautaia e le faamalu o faalapotopotoga tuma’oti le SUNGO.
O le autū e pei ona faailoa ai i se pepa o faamatalaga e tāua le a’oa’oina o sui o komiti a Fono Faavae, auā o latou e gafa ma le faatinoina o galuega o le atina’e o itumalo ta’itasi e tauala mai i le poloketi tasi le miliona tala.
