Ua lipotia i le asō o le a faaaogā e Trump le avanoa e faia ai lana lauga i le konekeresi o lona atunuu e folafola ai ma le maliega e faatatau i minerale i Ukraine, ua taunuu iai ma lea atunuu.
Fai mai le lipoti na faailoa e Trump i ana faufautua e mana’o e folafola le maliega lea i lana lauga i le konekeresi i Uosigitone i le asō.
Sa toe taofi mai le maliega lea i le vaiaso talu ai i le mae’a o le feiloa’iga a Trump ma Zelensky peitai ua faailoa i lipoti lata mai se faamatalaga a Zelensky, ua sauni e galue i lalo o le ta’ita’iga malosi a Trump ina ia maua se filemu.
Ua faia ia faamatalaga a Zelensky i luga o le upega tafa’ilagi a le X i ni nai itula talu ona mae’a folafola e Trump o le a taofia lē tumau e le falepa’epa’e fesoasoani tau militeli mo Ukraine, o se tulaga o loo faamoemoe tele iai Ukraine i le taua o loo iai nei ma Lusia.
