E feto’ai le vaalele ma le helikopa a le ami o loo alu atu e tulaueleele i le malaevaalele e lata i Uosigitone, ma i ulua’i lipoti e foliga mai e leai ma se soifua na faasaoina mai.

E tuufaatasia tala fou o loo tau sa’ilia pea tagata sa i luga o le vaalele a le American Airlines lea e faapea e 64 le aofa’i o le pasese ma le ‘au galulue, ae o le helikopa a le ami o loo faia toleniga e to’atolu sa iai.

E oo mai i le taeao nei ua maua le 28 tino maliliu, ma o i latou uma nei na maua mai i le vai i Potomac River, lea na pa’ūū iai vaa nei ina ua uma ona feto’ai i luga o le vanimonimo.

E lē o mautinoa lelei foi le atoaga o lenei mataupu ma le mafua’aga, ae i nisi o lipoti mai Uosigitone o loo ta’ua ai o fesoota’iga lava ma vaa nei e lua a o aga’i mai le isi e tulaueleele, ae o le tasi e alu ese mai.

E lē o iloa foi pe aisea na faalavelave ai le helikopa i le ala o loo sau ai le vaalele.

Na tapunia ai ma le malaevaalele i Reagan ma le faamoemoe e faato’ā toe tatala i le taeao nei, taimi Niu Sila.

E maua ane le tino o le vaalele lenei i le vai ua vae tolu, ma afai ae uma ane e leai se soifua o faasaoina o lona uiga faato’ā toe tupu lea o se isi faalavelave matuiā e aafia ai vaalele a le American Airlines e pei ona tupu i le 2001 lea foi na maliliu uma ai Ie 260.

Puna o Faamatalaga: Fatalities after passenger jet, helicopter collide while landing at DC airport