Ua tuuina atu nei le lapata’iga mulimuli a le Peresetene o Amerika, Donald Trump i le Hamas ina ia faasa’oloto ane uma tagata sa o latou ave faapagota mai Gaza i le taimi nei, o se gaioiga ua faia i le mae’a o ni nai itula talu ona faamaonia mai e le falepa’epa’e o loo faia nei ni a latou feutana’iga ma le vaega lea a le Hamas.

Fai mai le post a Trump i luga o upega tafa’ilagi e tatau ona faasa’oloto uma loa i latou o loo ave faapagota i le taimi nei ina ia toe faafoi uma ane tino maliliu o tagata na fasiotia e le Hamas.

Fai mai Trump o le a ia faamatuu atu ia Isaraelu mea uma o loo ia mana’omia e faauma ai le galuega lea i Sasae Tutotonu ma ua ia lapata’i foi i le Hamas e leai se isi o latou o le a toe saogalemu pe afai e lē faia le mea ua fai atu ai.

O loo talia e le CNN se tali mai le Hamas i le mataupu lea ae o loo ta’ua foi i isi lipoti a le CNN se faamatalaga mai se sui o Isaraelu e faapea o loo iloa e Isaraelu o loo faia talanoaga a Amerika ma le Hamas.

Puna o Faamatalaga: https://edition.cnn.com/2025/03/05/middleeast/trump-hamas-gaza-hostages-negotiation-israel-intl-latam/index.html