Ua amata faalauiloa nei se koneseti tele, e faia i Foga’a i Faleula Samoa i lenei tausaga, i le aso 13-14 o Iulai, 2025.
Ma o loo faailoa ai le to’atele o tagata pepese lauiloa i Niu Sila o le a auai mo lea faamoemoe tele.
O nisi o tagata pepese e aofia ai alo o Samoa i Niu Sila nei, le Adeaze, Lani Alo, Tree, Swiss ma le to’atele o nisi o le a faafiafia i lea faatasiga.
O lenei faatasiga, na fuafua mai e se tasi o faalapotopotoga ua faaigoaina o le MekoStrongCo mai Ausetalia, ina ua faamaonia aloa’ia e le Peresitene o le Ekalesia Metotisi i Samoa, Rev. Faulalo Leti Paaga ma le laulauafono a le Ekalesia aoao.
O lenei faamoemoe ua faaigoaina o le GOSPEL IN FOGA’A FESTIVAL 2025 ma ua faamauina, e lua aso o le a faatautaia ai.
O le a aofia ai se koneseti ma le tele o faafiafiaga faaleagaga ma faaleaganuu, faapea le anoanoa’i o o faafiafiaga ma polokalame eseese o le a faatino i nei aso.
Ae ua faaalia i luga o upega tafailagi mitamitaga o sui o le aufaipese lauiloa o le Adeeze, i le maua ai o lenei avanoa faaauro e toe foi ai i le atunuu.
Ua ta’ua i lea faasalalauga, ua silia ma le 12 tausaga talu ona le’i toe faafiafia i totonu o Samoa, ma o lenei faatasiga o se vaega e pele i o la agaga, o le a faafiafia mo se autū tāua o le talalelei.
Na faaalia foi e le Adeaze o lenei faatasiga ma lo la’ua auai atu iai o le a fai foi lea ma faamanatuga e manatua ai pea si o la tua’ā tinā ua atoa nei le 10 tausaga talu ona tuumalo.
Puna o Faamatalaga: MEKOSTRONGco & Adeaze Office
