Ua amata i le Aso Gafua o lenei vaiaso le polokalame faalea’oa’oga a le Lakapi Samoa mo le umi e lua vaiaso e a’oa’o ai faia’oga o a’oga maualuluga i le atunuu i tomai i le avea ma faia’oga o le taaloga lakapi, faapea isi tiute tauave mo le atina’eina o le taaloga i totonu o kolisi ma a’oga maualuluga i le atunuu.
Ua faailoa e le Ofisa Sili o le Lakapi Samoa le tofa Seumanu Douglas Ngau Chun e tāua le a’oa’oga ona o loo faatulaga e faatino e tusa ma ālafua ua faataoto e le pulega o le lakapi i le lalolagi.
Faaalia foi e le Ofisa Sili e matuā tāua tele le lava tapena o i latou e avea ma faia’oga i tulafono o le lakapi ina ia faailoa atu ai i fanau o loo fiafia e taalo i le lakapi.
O le aso 13 i le aso 24 o Ianuari e faagasolo ai lenei faamoemoe o le Lakapi Samoa o se tasi o ana polokalame o le a tatala ai le atina’e o le taaloga lakapi mo lenei tausaga fou ua amatalia.
