O le faai’uga o le masina faai’u o le tausaga na te’a nei na tuua ai le atunuu e le Amepasa o le malo o Iapani o Senta Keisuke ua mae’a lona taimi galue i Samoa, ae o le vaiaso nei ua amata aloaia ai tiute o le Amepasa fou o lea Malo mo Samoa le susuga Ryotaro Suzuki.
A o le’i amata tiute o le sui fou o le malo o Iapani e faamautū i lo tatou atunuu ma galue ai, o le Aso Tofi o lenei vaiaso na tauaao muamua atu ai ona tusi taualoa mo lona tofiga i le afioga i le Ao Mamalu o le tatou Malo le afioga Tuimalealiifano Vaaleto’a Sualauvi II.
Ua 51 nei tausaga talu ona faavae sootaga faavaomalo o Samoa ma Iapani talu mai le tausaga e 1973 ma o sootaga ia na faatāua e le Amepasa fou o lea malo i lana saunoaga ina ua tauaao ona tusi taualoa o lona tofiga e pei ona filifilia ai e lona malo e avea ma sui o Iapani mo Samoa.
O sootaga vavalalata foi o atunuu e lua na faailoa le tuputupu pea ina ua malele le afioga i le Ao Mamalu o le Malo e faafetaia le sui o lea malo i le tele o atina’e lelei o loo fesoasoani mai ai Iapani i le atina’e o le malo o Samoa.
Sa avea Ryotaro Suzuki ma Amepasa o lona malo i le atunuu o Iceland a o le’i filifilia e galue i Samoa.
O le aso 16 o le masina na te’a nei o Tesema na taunuu ai i Samoa le sui filifilia o le malo o Iapani mo le tauaveina o lona tofiga Amepasa.
