O le asō lea o le a amata faamamalu ai se tasi o tulafono e agai sa’o lava i le faamutaina o le soifua o le tagata aemaise lava i latou ua matutua soifua pe aafia foi i gasegase tuga.

O NSW le setete mulimuli o Ausetalia lea ua faatino ai lea foi tulafono i le mae’a o ni finauga tetele sa faia foi muamua.

Ina ia agavaa le tagata i le tulaga lea e tatau ona silia ma le 18 tausaga ma ua iai i se tulaga ua toe ono masina pe itiiti ane ua faailoa iai e fomai e soifua ai.

O le faaiuga e tatau foi ona faia e aunoa ma se faaoso e se tasi pe afai ua tele ane ni talosaga ia faauma loa le soifua. 

Ua faailoa ua mae’a faatulaga foi puipuiga latou mo le aufaigaluega poo fomai ma ua iai le fono faatonu o loo latou faatautaia lea tulaga.

O isi uma setete i Ausetalia ua iai uma foi tulafono faapea.

O le voluntary assisted dying lea e faaigoa ai le faiga lea i le faaperetania ma o loo tumau pea o se solitulafono lea i le Northern Territory faapea foi ma le ACT e ui ua iai tulafono ua faaulu i le faaitu lea i le masina talu ai e talosagaina ai le faatulafonoina o lea faiga o le ofo ane o le tagata ua fia manao e faauma lona soifua ona aafiaga tuga o gasegase e aafia ai.