Ua amata faaaogā nei le masini fā’ata ua mae’a faatuina i se fale ua fausia i luga o le uafu tele i Apia, e su’eina ai pusaoloa o loo aumai ai i le atunuu soo se oloa mai fafo.

O le afiafi o le Aso Tofi o lenei vaiaso na tatala ma faalauiloa ai lea auaunaga fou mo le Matagaluega o tiute ma tupe maua, e pei ona sa faatupe se vaega tele o le aumaia o le masini ma le fausia o le nofoaga mo le masini fā’ata i se fesoasoani tupe mai le faletupe o atinae o Asia.

O le tausaga e 2021 a o lumanai le palota tele i lea tausaga na amata fuafua ai le aumaia o sea masini e su’eina ai pusaoloa ma soo se oloa e faaulufale i le atunuu, ona o atugaluga i le aumai faananā o oloa e lē tatau ona faaulufale i le atunuu, e pei o laau malosi e lē faatagaina, ma mea faapāpā malolosi, aemaise o nakoti poo laau ma fualaau faasāina.

Ua lē gata ua tatala le faaaogāina o le masini fā’ata ae ua tatala foi se isi vaega o lea lava poloketi o le nofoaga e su’eina ai pusaoloa pe afai ua faailoa i suesuega a le fā’ata le masalomia o ni oloa e lē talafeagai ona faaulufale i Samoa.

O le Sui Palemia ma o le Minisita foi lea o le Matagaluega o Tiute ma Tupe Maua na saunoa i le faalauiloa o lea taumafaiga fou a le Malo, ma o ia foi na ootiina le lipine mo le fale ua iai le masini fā’ata ma se loli tele ua pipii i le masini mo le faia o le galuega.