O le suesueina o tulagalima poo fingerprints i galuega faaleoleo pe a tulai mai ni gaioiga solitulafono e matua tāua tele le lelei o vaega e faatino ai, e pei ona amata faaaoga nei e leoleo se masini faaonaponei e saili ai tulagalima.

O se masini ua faailoa e le matagaluega o leoleo, falepuipui ma le ola toe fuataina ua mafai ona fesoasoani malosi i le vaega o loo feagai ma le sueina o ia vaega, ma ua faafetaia ai le foai mai le Malo o Ausetalia e ala mai i le faiga paaga a le matagaluega o leoleo a lea Malo ma le matagaluega o leoleo i lo tatou atunuu.

Ua faaalia e mafai ona teuina i lea masini le 50 afe o faamaumauga o tulagalima e mafai ona faatusatusa ai le eseesega o tulagalima o ni tagata ua masalomia i ni gaioiga solitulafono poo tagata e lei iloa ae e iai ni sootaga i le faia o se solitulafono.

O le afioga Tagaloa Tipasa Matamu o se leoleo sinia o loo faauluulu iai le vaega o suesuega faapitoa a leoleo le forensic na ia faailoa i le sui o le Malo o Ausetalia le agaga faafetai, ona ua maua se masini o le a fesoasoani tele i le latou galuega i le sueina o tulagalima.

O Tagaloa Tipasa o se Malu o le Malo ua maua ona faailoga ma tomai aoaoina i lea matata faapitoa i le faia o suesuega a leoleo i ni solitulafono.