O le masina fou lenei o Aperila o le a amata ai se suiga fou i le sailia o tagata e agavaa mo galuega faavaitaimi i Niu Sila ma Ausetalia, lea o le a tuu atu ai le iloiloina o talosaga faapea le filifilia o alii ma tamaitai e tatau ona maua ia galuega, i ofisa o fono faavae a itumalo faapalota e 51 o le atunuu.

O se faiga fou ua iai le finagalo o le Malo, o le a mafai ona saili tonu ai tagata e talafeagai ona maua ia avanoa faigaluega, ma taofia ai nisi o faafitauli ua tutupu ma aliali mai, ma aafia ai le va o ulugalii ma fanau.

I nai vaiaso e lei mamao atu na faailoa ai e le afioga i le Sui Palemia i sona finagalo faalauaitele, o loo faaauau pea ona malaga tagata faigaluega faavaitaimi i lisi o suafa o i latou ua mae’a ona filifilia mo isi aumalaga o sosoo ai nei.

O le tuuina atu o le filiina o i latou e agavaa mo ia avanoa faigaluega i ofisa o fono faavae a itumalo, o le a mafai ai foi ona iloa lelei talaaga o tagata, ma ni faafitauli o aafia ai, aemaise o le a galulue ai pulega a nuu ma ofisa o fono faavae i le mataitu lelei o o latou tagata e maua ia avanoa, pe a oo ina aafia i ni faafitauli a o iai i fafo mo ia galuega.